قصتي مع مجنون عاقل

اليوم وانا رايح الشغل نزلت محل بيع خمير ونزلت حبتين خمير وقلص شاي وجلست أكل واشرب وانا في أخر روقان.

جالس أتفرج على مبنى المجلس المحلي والناس رايحة أشغالها إلا ومجنون يمشي ويزبط قصعة عصير وقف قدامي.

قال لي :" ممكن أسالك شيء ..؟

تلتفت أشوف حد يشوفنا قلت له :" اسأل؟

قال :" ياخي مش الإمارات عملت ميليشيا في حضرموت وشبوة وسمتهم النخبة؟..

رجعت أتلفت مرة ثاني وحنبت لي اللقمة بحلقي وقلت الله لاصبحك شكله من الخبرة وناوي يجرجرنا بالهدرة قلت :" ايوه صحيح  الله يحفظ الإمارات ..

حك شعر رأسه وقال :" طيب  مش كمان الإمارات عملت لكم ميليشيا بعدن وسمتها الحزام الأمني وقوات أخرى ..

رجعت أتلفت مرة ثانية وتذكرت الضرب اللي لاقيته قبل شهر  ومغطت دغمة شاي وقلت :" ياحاج انا معي شغل وبمشي كمّل الشاي والخمير.

مسك يدي وقال :" لالا جاوبنا بالله  مش هي نفس الميليشيا اللي بحضرموت وشبوة هي نفسها اللي ماسكة عدن بنفس التشكيلة ومعهم نفس الأطقم ويستلمون نفس المخصصات عاد اصحاب عدن اكثر؟.

قلت له :" إلا هي نفسها وبنفس الطريقة ..

قال :" اهاااا هيا قولي مالها الميليشيات ذيك ضبطت الأمن وذي الميليشيا لعبت على الأمن..

وقفت واقف وانا أتلفت أشتي أشوف حد من الخبرة قريب مننا ومسكت الرجال من حلقه :" وقلت اسمع أنت ناوي تشوه الأمن حقنا بعدن أكيد أنت إصلاحي أو حوثي ومتنكر ، الأمن الحمدلله منضبط زيه زي شبوة وحضرموت بدليل انا جالس اشرب شاي واكل خمير ..

مد يده ومسك معي وتشادينا وصاح:" لالا انتم كذابين اللي هناك ميليشيا بس رجال دولة وفاهمين وانتم مش حق دولة هذي القصة بمختصر مفيد لاتتعذروش بالإمارات ولا بجدتي الإمارات دعمت في شبوة فأثمرت ودعمت في حضرموت ونجحت ودعمت عندكم طلعتم سرق ونهابة.

قلت :" ياحاج صلي عالنبي انا ايش دخل اهلاتي بالموضوع خلينا نشوف الحبة الخمير.

زبط الميز وطعفر القلص الشاي وقال :" طيب لاتتعذورش بالإمارات مالامارات كمان تدعم في شبوة وحضرموت ونجحوا رجالها هناك مال اللي اختارتهم الإمارات هنا فاشلين ..

قلت له :" طيب اسألهم هم تسألنا انا ليش؟

 

فكيت له وقفزت لطرف الطاولة وقلت :" أنت الآن تشتينا اسفخك بالشاي الحامي ، الضلع اليمين عادوهه مكسور والمسدس والجوال عاده معهم ، هؤلاء رجال دولة والأمن تمام خلينا اروح شغلي ..

وانطلقت اجري اجري وسط حي العيادات إلى ان وصلت إلى مكتبي .. وانا اقول في قلبي ... وقالك هذا ليش فشلت عدن ونجحت شبوة وحضرموت .. حنابة من الصبح ..

مجانين أخر زمن

مقالات الكاتب

واسأل نفسي

#وأسأل_نفسي!فتحي بن لزرق"إن الحياة كلمة وموقف، الجبناء لا يكتبون التاريخ، التاريخ يكتبه من عشق الوطن...

هلال حضرموت

زرت حضرموت قبل أيام وتجولت في مدينة المكلا والتقيت بعدد كبير من أبنائها .هذه هي زيارتي الثانية للمدي...

خيانة التكريم

قبل 3 اعوام انتهى الزميل الصحفي "علي سالم بن يحيى " من تأليف كتاب عنونه بـ "القضية الجنوبية في الصحا...

#ايش_أصلك؟

فتحي بن لزرق وانا صغير أجبرتني الظروف وأسرتي على التنقل بين مدن يمنية عدة.. ومابين مدينة واخرى تشك...